Служба преподобному АЛЕКСАНДРУ ВОЧСКОМУ. Текст.

 

________________________________

Текст службы преподобному Александру Вочскому публикуется на церковно-славянском языке гражданским шрифтом. Для набора использовалась копия рукописного текста. 

Примечания:

• Разбивка текста по абзацам приведена для лучшей читаемости.
• В прямые скобки заключены восстановленные или добавленные слова.
• Текст не для богослужебного употребления, и его публикация носит частный характер.

 

 

 

СЛУЖБА ПРЕПОДОБНОМУ АЛЕКСАНДРУ ВОЧСКОМУ

Месяца Августа в 1 день,

память Пребодобнаго и Богоноснаго Отца нашего Александра Игумена составльшаго обитель Всемилостиваго Спаса на реке Воче близ града Соли Галицкия.

 

На малой вечери стихиры глас 1 подобен «Небесным чином» поставим стихиры 4. Удалихся бегая мирских молв и в пустыню псаломски водворился еси, богоблаженне Александре, и в ней приял еси Бога. в тя вселившагося емуже за ны молися преподобне, спастися душам нашим.

Законно препроводил еси, жизнь свою в пустыни, и в ней плоти страстная двизания, до конца потребил еси, и победный венец от духа яко победитель изрядный приял еси, отче наш блаженне Александре, егоже моли, спастися душам нашим.

Просвещаемъ зарею отче невечернею и божественным осиянием бесовский мрак и страстей тьму отгнал еси, и явился еси добродетелей столп световиден, и лествица яже истинно к Богу верныя возводящая емуже за ны молися преподобне, спастися душам нашим.

Совершенную к Богу стяжал еси отче земная вся приобидев, к небесным востекл еси радуяся, венценосче блаженне Александре, молися за ны Христу Богу, спастися душам нашим.

Слава глас 6, самогласен. Всесильное действо святаго духа: в тя вселися невидимо: и божественным мановением, благотечне пришел еси в пустыню, и ту храм чуден Спасу воздвигл еси, и иночествующих множество собра, и сия добродетелем светло блистающия, воздержанием мудростная воображ: и ныне в память твою сошедшеся, верно вопием ти, слава преподобным отче наш преподобне Александре: моли Христа Бога спастися душам нашим.

И ныне Богородичен по гласу:

На стиховне стихиры глас 2 подобен «Доме евфрафов». На небо востекл еси добродетелем, и оттуду отче озаряеши вся земныя концы, просвети и нас богомудре Александре, чисте празднующих святую память твою: Честна пред Господом: Смерть преподобных Его:

Дом и жилище Святей Троице явился еси, отче наш преподобне Александре. Еяже моли мир граду Солигаличу, и обители твоей даровати, и душам нашим велию милость.

Блажен муж бояйся Господа: В заповедех Его восхощет зело.

От младых пелен прилепился еси к Богу преподобне сего ради жизнь сию нивочтоже вменив, крест Господень паче возжелел еси носити и вся земная возненавидев, на реце Воче, в пустыню водворился еси радуяся.

Слава и ныне: глас 4. От всякаго прещения и озлобления человеческаго, спаси ны Пресвятая Дево, тя бо имамы покров и заступление, и рожденнаго из тебе Бога нашего, Егоже с преподобным моли, спастися от бед рабом твоим.

На велицей вечерни.

Блажен муж, на Господи воззвах стихиры (аще убо бдение в приходских храмах, поставим стихов 8 аще ли же ни точию 6 а в обители преподобного бдение на сей день неотменно да бывает).

Глас 5 подобен «Преподобне отче»: Преподобне отче, богоблаженне Александре, иго Христово на рамо свое взем, и в пустыню при реце Воче вселился еси, и в ней добродетелей вверх усердно совершил еси, и достигл еси честнаго пути, в вечные обители ведущаго, на немже утверждена любовию Господа узрев, восход тебе предлагающа на небеса, ему же ныне предстоиши со всеми преподобными, молися спасти благочестно верующия во Святую Троицу, и любочестне почитающия присно радостную и всепразднственную память твою.

Аще ли бдение [стихиру] дважды: Преподобне отче Богоблаженне Александре, в пустыню водворился еси, благодатию Христа Бога в ней же яко лоза плодовитая, при реце Воче насадился еси, и достойныя плоды Христу принося, и вся приходящая, наставлением божественным возводя Христу, Ему же ныне предстоиши со всеми преподобными молися спасти, благочестне верующия во Святую Троицу, и любочестне почитающия приснорадостную и всепразднственную память твою.

Преподобне отче, богоблаженне Александре, страсти телесныя прележным молением к Богу, и браздою воздержания потребил еси, змия льстиваго слезными потоки потопил еси, угодил еси Богу, паче и ныне достоблаженне, темже тя украси,небесными дарованьми человеколюбец Господь, Ему же ныне в месте прохладнее и во свете немерцающем, предстоиши со всеми преподобными, молися спасти, благочестне верующия во Святую Троицу и любочестне почитающия приснорадостную и всепразднственную память твою. (Единожды).

Ины стихиры глас 8 подобен «О преславного чудесе».

Постническое благочестие на небесный восход шествовати наставил еси отче преподобне Александре, и к наследию негиблему в вышняя ведый, показался еси всем огненный столп, сияя чудесы в пустыне и зарею духовною, вся концы земли облистал еси.

Преставился от земных и востекл еси на небеса в вышний Сион и зайде во обители невечерния, и ту трудов своих, радостотворныя класы пожинаеши, ихже на земли слезами всеял еси, и со ангельскими ликостоянии, присно поеши Господу.

Поревновал еси, ангельскому житию блаженне Александре, аще и во плоти сый тленней: сего ради отечество свое и сродники вся оставив и пустыню воцкую радуяся достигл еси, к нейже пощением и молитвами, сподобился еси взыти, к мысленному востоку Христу, отнудуже попрещати не остави ны, но выну моли о нас человеколюбца Господа;

Слава глас 5. Радуйся вся Российская страна, содержащая в недрех своих, цельбоносное и спасительное тело, преподобного отца, веселися пустыня нерождающая. Красуйся неболевшая, зрящи в себе светильника восиявшего яко солнца воспой в песнех святый Сионе одушевленный, яко имаши почивающагоо Христова оружника, мысленнаго велиара победшаго, воскликни в кимвалех чада собранная, от севера и мора и от восток, пришедшия торжествовати святое богомудраго нашего наставника празднество: воспоем глаголюще: радуйся светильниче всесветлый, имже мрак душ человеческих мысленно отгнася, и просветишася очи душевныя, радуйся отче всеблагий, умноживый чада в пустыни, духовных желаний, имже мрачная пустынь просветися, и освятися, радуйся избавителю, града Солигалича, и всея земли, изрядный защитниче, и похвало русския земли и утверждение.

И ныне. Богородичен [Догматик] глас 5 «В чермнем мори»:

Выход [вход – в совр. литургике], прокимен дню, и чтения 3, 1 Праведных души в руце Божий, 2. Праведницы во веки живут, 3.  Праведник аще постигнет скончатися в покои будет:

На литии стихиры Глас 1, подобен «Прехвальнии мученицы»: Радуйся Российския земли светило незаходимое, и честное вселенныя знамение, пустыни доброе прозябение, и праведных божественное наслаждение, иночествующих иправление и правило ленящихся к Богу воздвижение, источниче неисчерпаемый чудес Боготочных, чистый Святаго Духа органе подвигов постнических благовонный сосуд. Угль Богосиянен, огню приближився Христу, Его же моли преподобне, мир вселенней даровати, и душам нашим велию милость.

Глас 2, подобен «Егда от древа тя»: Радуйся Российския земли светило незаходимое, и пощения светлых радосте чистоты сосуде благоуханный, цвет девства неуведаемый, целомудрия столпе, им же всякия страсти востания упразднишася, смирения забрало высокое, имже бесовския полки заградишася, вожде святолепный, возводя добродетелем ко Христу люди своя, помраченным просветителю, падшим воздвижение, преподобным освящение, благий сирым питателю, и нищим подателю благоутробный, ангелом равноревнительне, евангельскому учению последственниче, странствия возлюбленниче, пастырю заблудших овец телесный, тобою во вся преподобне хвалятся и вся прославляют тя. Александре отче чудес [кладезь] неистощемый, похвало Солигаличу, спасай поющих тя присно и испроси от Христа вселенней мира, и душам нашим велию милость.

Глас 3, подобен «Дева днесь»: Радуйся Российския земли, светило незаходимое, ангелом подрожательниче, гражданине пустынный, всемирный преподобне Александре, пустынный наставниче, верою сотворяющим празднество твое, свыше милостивно приникни, и испроси от Христа, еже на ны спасти от врат ненаветны.

Глас 5, подобен «Собезначальное слово». Приидите вернии, и святителей сословие, и иноческая чета благолюбивая, духовный лик составим, возсиявшему в концех галическия земли, новому светильнику. В песнех воспоем глаголюще радуйся богоблаженне Александре, токами слез твоих, вся вражия возношения потопил еси, радуйся Российская звездо светозарная, просвещающая мысли сердец человеческих, и освящаеши с верою приходящих ти, просвети и нас преподобне, чтущих любовию святую память твою.

Глас 6, подобен «Тридневен воскресл еси». Приидите верных собори, и Христоименитых множества, воспоем духовно веселящеся преподобнаго отца, добраго пастыря пустыннаго воспитания плодоносную отрасль, добродетелей утвержденую ограду, иночествующим наставника ко спасению, всем хвалящим его, и память и верно сотворяющим, токи изливает преславных целений, на очищение душ и телес наших, радуйся блаженный Александре, высоко парный орле, светоносный облаче, российская похвало и молитвенник ко Спасу о душах наших.

Глас 7, подобен «Не к тому пламенное [оружие]»: Веселися стадо блаженное о Господе, духовная чада таковаго светильника быти, иже пресветлыми чудесы своими всю галическую страну озарившаго, его же бо прослави Бог, знамени же и чудесы преславными своими, обильна исцеления дарует приходящим с верою, темже обстояше всечестную раку его, молимся ему глаголюще: ходатай непреложен святе буди, о нас ко Пресвятей Троице, и подвигни с собою лики святых, ихже ты житию поревновал еси, яко да тихо житие и безмолвно поживем в веце сем, и в будущем жизнь вечную получим.

Слава глас 8, подобен «Премудрости». Прискорбным ходя путем, ведущем в вечную жизнь, преподобно на земли житие скончав, и в пустыне всякое озлобление претерпел еси, мраз и зной, алкания и жажды, и на земли леганиями, всячески тело свое, удручив, и яко солнце в Галичестей стране, и во всей […] 

Прим.: далее в тексте, окончание «славника» на литии отсутствует. 

Фрагмент стиховен:

[Стихира]: оружием посекл еси, светом пресветлым озаряем, духом святым в тя вселившагося, и яко на свещниче добродетельми всюду сияеши, темже Христа моли Христу помолися преподобне, спастися душам нашим. Слава глас 8 . Инок множества, наставника тя чтем преподобне, отче наш Александре, твоею бо стезею воистину право ходити познахом, блажен еси Христови работав, и вражию низложил еси силу, ангелов собеседниче, преподобным единокровне и праведным с нимиже молися Господеви помиловатися душам нашим. И ныне Бого Безневесная дево.

Тропарь [святаго] глас 4. Се удалихся бегая давидски, отче мира и водворихся в пустыни, и в ней процвел еси яко крин благоюханен,чистаго ради жития своего: в чистоте бо сердца своего преподобне,течение на земли скончал еси, во всем ревнуя преподобному Авраамию: преподобный явися наставник иноком, и постником благое украшение, сего ради Господь труды твоя видев, даром чудес обогати тя, мы же чада твоя духовная радующеся вопием ти: радуйся преподобне Александре, пустынная отрасль.

На благословении хлебов тропарь святаго [глас 4] дважды и Богородице Дево Единожды.

На утрени на Бог Господь, тропарь преподобному дважды. Слава и ныне: Богородичен.

По 1 стихологии седален глас 3, подобен «Дева днесь». Уставы отеческия и заповеди, мудре сохранил еси, и храм Всемилостиваго Спаса, прекрасен лепотою устроил еси, на реце Воче, и лики иноческия в совокупление собрал еси, единогласно славити Всечестную Троицу.

Слава и ныне: Богородичен: Превыши явися небесных сил Пресвятая Дево, заченши бо слово Божие неизреченно, иже всяческая словом совершив, и от Отца прежде век родися, того чтим моли непрестанно избавити ны от враг наших, борющихся присно с нами.

По 2 стихословии седален глас 2, подобен «Вышних ищай». Мудрование плотское умертвил еси, чести и имения совлекся еси, и ризную лепоту ни во чтоже вменив власяная рубица вожделел еси носити, и сим показуя глубочайшее смирение.

Слава и ныне: Богородичен: Светлыми зарями всю землю, возсиявшее солнце из чрева твоего озаряет Владычице имиже просвещеся, тя согласно Божию Матерь, песнею воспеваем.

По Хвалите имя Господне, припев: Ублажаем тя преподобне отче Александре, и чтем святую память твою, наставниче иноком [монахом] и собеседниче ангелом.

Псалом избранный; Терпя потерпе Господа: По полиелеи седален глас 6, подобен «Ангельские предидите [силы]»: Древних онех и великихотцев в посте просиявших, из детска житию их поревновал еси преподобне Александре: в пустыню вселился еси, и тамо все свое чаяние  к нему возложив и тебе чудесы прослави.

Слава и ныне: Богородичен. Явися сень слову молити Дево Божия: приемши бо огнь неопалимый во чрево свое, и родила еси Бога, давшего нам живот, и велию милость.

Степенна первая: антифон 4 гласа, прокимен: Честна пред Господем смерть преподобных его.

Стих: Что воздам Господеви о всех яже воздаде ми:

Евангелие от Матфея зачало 43.

По Евангелии стихира, глас 5 . Преподобне отче не дал еси сна очима своима, ни векома дремания, дондеже душу и тело от страстей свободил еси, и себе уготовал еси духовное жилище, пришед бо Христу со отцем обитель в тебе сотворю. Единосущныя Троицы благодать прием: отче преподобне молися о душах наших.

Канон Богородице. глас 8 со ирмосом на 6. И святому на 8.

Канон преподобному Александру Емуже [краегранесие]. Оясни ми язык преподобне, яко возмогу пети тя.

Глас 8 Песнь 1

Ирмос. Крест начертав Моисей:

Запев. Преподобне отче Александре моли Бога о нас. Милостиве Господи услыши молитву раб своих, молящихся Тебе Вышний Всецарю, отверзи ми устне недостойному, да возмогу воспети твоегоугодника, преподобного Александра.

Запев. Аще и гроб скры твое трудолюбное тело преславне, но чудесы обаче всех удивил еси, к тебе притекающая верою целенияпростираемая от святых ти мощей приемлют и радующеся хваляще тя целеб подателя.

Запев. Ревнитель явился во плоти преподобным отцем, и шлем смирения на себе возлож уповательно Христу последовал еси егоже ради всяческая, прискорбная,доблественне претерпел еси. Богородичен. Разумехом Богородице Дево, яко непреложно из тебе Бог слово воплотися, рабий зрак нося восприяв, нетерпя своего создания мучиму быти во аде, но ради нас тобою к нам произыде.

Песнь 3.

Ирмос. Жезл во образ тайны приемлется:

Запев. В цветущей юности своей преподобне ничтоже пустощному внимая, но присно божественным, повелением себе повинув, и тем от кальнаго деяния очистился еси. Христу единому служа радуяся.

Запев. Моря житейскаго треволнение, невлажно переплыл еси воздержанием, и яко елень жаждущий источников водных, тихое пристанище пустыню достиже, желая в ней напитися божественнаго веселия; яже и приял еси в ня дар от Христа целебный, и с верою приходящая ко святому ти гробу исцеляеши.

Запев. По представлении твоем преподобне, аще и земная недра приемше тя, но сияния чудесныя ти лучи немогоша сокрыти за небо видяще в себе содержимо святое тело твое, испущающее не оскудныя реки исцелений пресвятая же твоя душа на небесех со ангелы ликует в вечных обителех. Богородичен. Ширши небес явися Богородительнице, приемши бо во чрево свое невместимаго, Его же нетленно породиши, на руку своею носила еси: и от сосцу млеком доивши манием питающаго вся.

Седален глас 4. Земный ангеле, небесный человече, преблаженне Александре, помощника ведуще тя днесь: любовию притекаем ко святому храму твоему, его же лепотно воздвигл есси спасителю нашему, и раку твою честную обступающе, душевно лобызаем,просяще от тебе великия милости, еже и ниспосли нам свете, да ею укреплении и мы, просветимся светом божественнаго познания: во еже по подобию возтещи в премирная.

Слава и ныне: Богородичен: Едину тя в женах Деву обрете, огнь бо вселися в тя божественный, и человеком небесную лествицу показа тя, тобою бо вышний к нам сошел есть.

Песнь 4.

Ирмос. Ослышах Господи:

Запев. Пустыня тебе жителя непроходна име, еже бо ту отче безчадствующую расплодил еси, и любовию в ней обитель пречудну соделав: Всемилостиваго Спаса водам на освящение.

Запев. Земная вся яко несущая презрел еси, небесное паче возжделел царство, и ныне зашел еси в незаходимыя радуяся, и ту непрестанно со ангельскими вои, ликуеши у престолу всех Царя.

Запев. Первее украсился еси добродетельми в животе своем преподобне, темже по отшествии твоем еже ко Господу, честные твоя мощи явишася источник, кипящ присно недужным исцеления, показующе тя изобильна чудес подателя.

Богородичен. Богородице Дево моли Сына своего и Бога: да подаст ми прощение содеянных мною, ты бо Мати сущаго живота, можеши бо творити елико волиши, нашея бо жизни ты еси окормительнице.

Песнь 5

Ирмос. О треблаженное древо:

Запев. Вар дневный, и нощный мраз на себе понесл еси преподобне, и жестокими бо бдений плоть свою увядил еси, и слезными струями, потопил еси вражия полчища, и просветил еси, иже тя верою познавших, яко сущий врач и просветитель.

Запев. Аще и тело твое многочудесное преблаженне, перстию покровено, но явися тлению непричастно, за не бо рака твоя юхает выну миро благовонное, и проливает реки целения богатно, всем приходящим верою.

Запев. Многосветлый светильник явися освящающ присно чудесною лучею страну Галическую, паче же сияет всей подсолнечней независтною благодатию, невозможно бо сокрыти чудес в себе боготочных пустыня содержащая, аще бы могла вещати, то непрестанно бы глаголала, грядите и почерпите воду безсмертия во мне явльшахся от источника.

Богородичен. Богородице Мати безневестная христиан похвало, и предстательство непостыдное призри на мя окалявшагося греховными делы, и разреши вериги согрешений моих, орошающи мя свыше милостию.

Песнь 6

Ирмос. Водного зверя во утробе:

Запев. Плотское все мудрование, духови повинул еси свете Александре, и неудержимая того стремления постом увядил еси, и ныне от Христа, яко победитель изряден, победным венцем увязеся славне.

Запев. От юности своея маловременным не прикасался еси, но Божественною любовию, яко  же огнем жегомый распалився, крест Господень на рамо восприемши оставив вся жития сего прелесть, и отиде пустыню Воцкую, и ту благолепне пожил еси.

Запев. Егда преподобне по пустыни шествие творя, тогда душегубительный ловитель велиар многати препинания сотвори, вдивия преобразованием лестно слагашеся, ово же страхование являюще ти, ты же того шатания немощнаго неустрашился еси, но молитвами своими, яко дым разгнал еси. Богородичен. Невесто Божия пребысть Богородительнице, се бо слово превечное плотию родила еси во спасение наше, имже избавихомся от тмы и сени смертные.

Кондак глас 8. Подобен: «Преславное [чудо]». Веселися днесь Галичская Соль: в память молебнаго торжества преподобнаго Александра, созывает праздновати всех церковь Божия: в твоем успении, премудре, днесь сошедшеся чета иноческая и Христолюбивых сонмы восплещем руками и умильным гласом воззовем глаголюще: радуйся пустынный жителю.

Икос. Всех Творцу и Богу воздадим людие славу, давшаго светильника таковаго Русстей земли, и любовию сошедшеся в церковь Спасову, приступающе с верою ко святым мощем его, и ликуем вси согласно, радующеся глаголем: радуйся преподобне Александре, презревый суету мира сего яко несущую, радуйся сподобивыйся достигнути тихаго пристанища пустыннаго жительства, радуйся, яко неустрашился еси в ней демонов коварствия, радуйся, яко неубоялся еси разбойническаго нашествия, ниже приходимых ти кровоядцев, радуйся, яко сподобился еси будущая прорицати, радуйся, иноком блаженная степень, и собеседниче Авраамиев, радуйся святый верше добродетельнаго жития, радуйся честная уста затворенная молчанием: радуйся похвало Солигаличская, радуйся благоверному Царю нашему непокоримая крепость, радуйся ветвь богонасажденная реце Воче благопристойное украшение, радуйся непревратное заврало от иноплеменных нахождения, радуйся прозябение Воцкое: радуйся пустынный жителю.

Песнь 7

Ирмос. Безумное веление мучителя:

Запев. Смирению Христову был подражатель преподобне, и всех плотских похотей отвергся еси, и тому чиста себе соблюд и непорочна преславне Александре, и ныне в небесная светлости зайде, зря непрестанную славу и веселие безконечное.

Запев. Пресвятей Троице служитель на земли явился еси свете отнюд ненавидя славу временную, но возлюбил еси паче честное молчание темже и пустыни прозябение явился еси честная славо отцем Александре отче наш.

Запев. Егда же враг устрашаше тя преподобне, бо являшеся превратный всяческим подобием овогда бо змиею и аспидом, овогда же дивеем животным, хотяше бо устрашити всячески непревратнаго, ты же призыванием Божия слова, и молитвою своею устрашения вся попрал еси его. Богородичен. Божию Матерь днесь вси ведуще тя: молим прилежно, моли Сына своего, из тебе плоть приемшаго, спастися всяческих бед твоим рабом.

Песнь 8

Ирмос. Благословите отроцы Троицы равночислении:

Запев. Богатство земное оставил еси, славы же и чести, вся презрев, учителю си единому последова, помышляя себе получити от него небесное богатство, его же ныне наслаждаешися преподобне, Христа воспеваеши во веки.

Запев. Присно во уме своем блаженне поминая страх судный, и еже предстояния десная и шуяя и тем убеже сопротивных ловления, в пустыни мученичски жизнь свою препроводил еси, Христа единаго присно радостно воспевая во веки.

Запев. Кто твоя труды может изчести преподобне, еже с бесы мысленнаго твоего борения, или пустыннаго озлобления, колико подъял еси всякаго озлобления от тягости воздушныя, но вся оное ни во чтоже вменив противобудущаго воздаяния, его же ныне приемши воспеваеши Господа во веки. Богородичен. Дево Мати Божия Сына своего моли, от вражиих прилог мя избавити, и на падениих всяких и бед потщися светлое покоище Сыну своему мя сотворити Всенепорочная, яко да тобою очищен, тя Пречистую воспою во веки.

Песнь 9

Ирмос. Таин еси Богородице рай:

Запев. Владыко Господи приими мое малое сие пение яже дерзнух немощный песнь принести прославляющему Тя твоему угоднику, Ты же мене одержимаго грехи многими невозгнушайся, но ради Твоего блаженнаго Александра, просвети моя очи душевныя, еже ко спасению.

Запев. Преподобне отче блаженне Александре, дерзнух тя недоумением одержимый от души воспети, ты же оное восприемши, моли спастися ми к тебе присно прибегающему, и соблюди от всяких нечистот, окалявшагося мя, молитвами твоими святе еже ко Христу:

Запев. Скорбный путь текл еси неуклонно желая присно достигнути, вечнаго града в его же ныне дошед, наслаждаешися присно с лики преподобных в нем источника воды, и сладкаго обоняния райскаго.

Богородичен. Во чрево твое невместивый вместися, человеческое естество обожая и древле древа ради преслушания из селенных рая, паки возведе на первое достояние: свобождая ны лютого мучительства.

Светилен глас 2. Исцеления источники яко из кладязя неископанного точиши святе Александре присно, всем с верою приходящим ти, к чудотворней и ко ангелоговейней раце твоих мощей, целение подаваеши; аще бо и от земли взыде к небесным, но Богови днесь тамо с лики умных предстоиши жив сый и зде с нами невидимо водворяешися, яко предстатель непобедимый.

Слава и ныне: Богородичен. Тя немолчными гласы воспеваем Богородице, архангелов глас ти приносяще зовем, радуйся священнаго таинства явление: и слышание страшное, и едва видимое видение, радуйся Дево Богоневестная, падшим воздвижение.

На хвалите стихиры глас 4. Подобен: Егда Божественное звание услышал еси, тогда себе внушив си, позна непостоянаго волнения многомятежие, вся сия преходящая, яко паучину вменил еси, темже оторг себе человеческаго сожительства, пустыни Воцкия гражданин явился еси, преподобне Александре, в ней же многое время пребысть единствуя, отнюдуже тебе Бог собра ученик множество: пастыря тя устрояет быти словесных овец.

Егда Божественное звание найде на тя, тогда мирскую суету оставил еси, Христа же единого возлюбив от души, одеянию ангелов света образа, вседушно притекл еси, к преподобному Афанасию, от него же постризаем бываеши, и приемши благословение в пустыню текл еси, и ту мановением Божественным храм пречуден: многомилостивому Спасу возградил еси.

Цветяще тогда Божиею благодатию честная Христова Воскресения обитель, в нюже пришел еси преподобне Александре, яко странен сый, хотя совершенно устранитися мира странствовавшаго нас ради, водим был силою Божиею, в пустыню неимущую в себе. […]

Прим.: далее в окончании текста отсутствует около половины На Хвалитех.