СЛУЖБА собору преподобных отец в земле Костромской просиявших. Текст.

Солигалич, собор Костромских святых,СЛУЖБА собору преподобных отец в земле Костромской просиявших. Текст.

_________________________________________________________________

Служба собору преподобных отец в земле Костромской просиявших составлена в Авраамиево-Городецком монастыре Костромской епархии. 

Текст Службы, находится на рассмотрении в отделах Русской православной церкви, и пока не может быть использован в богослужебной практике. 

Редакция сайта

 

Солигалич, приход, храм, собор Костромских святых,

Собор Костромских святых. Современная икона.

 

 

СЛУЖБА
СОБОРУ СВЯТЫХ ОТЦЕВ
В ЗЕМЛЕ КОСТРОМСКОЙ ПРОСИЯВШИХ

ПРАЗДНОВАНИЕ ПАМЯТИ:
23 ЯНВАРЯ (ст. ст.), 5 ФЕВРАЛЯ (н. ст.)

 

МАЛАЯ ВЕЧЕРНЯ
СТИХИРЫ НА «Господи воззвах», глас 4; на 4:

Радуется вельми Костромская страна,/ веселится малое стадо Христово:/ преподобных и богоносных отцев собор прославляется/ и молитвенно ублажается нами днесь./ Церкви православной благолепие и украшение,/ иноков Боголюбивых похвала и слава,/ края сего утверждение и на небесех предстательство,/ и всея земли Российстей освящение.

Всечестнии и Богомудрии отцы,/ постницы и молитвенницы преславные,/ Христово смирение и Ангельскую кротость возлюбившии,/ безстрастия благодатного в преуспеянии духовном достигшии,/ Богодарованными добродетельми украсившиеся;/ во спасении душ погибающих тщащиеся/ всех притекающих к Вам, Костромския светильницы.

Преподобнии и Богоноснии отцы,/ чудотворцы и целители предивнии,/ духов лукавых благодатно победившие,/ и тех далече от душ одержимых отгнавшие;/ Богоданный разум Истины Христовой являя,/ на путь спасительный, яко кормчии искуснии наставляли есте/ всех притекающих к Вам, Костромския светильницы.

Златословеснии и Богоглаголивые отцы,/ Истины Христовой непоколебимии столпи,/ исповедницы и проповедницы небесных таин,/ исполнителие и изъяснителие заповедей Господних./ Веры основание и ересей погубителие,/ заблуждений и суеверий обличителие,/ и наставницы верныя/ всех притекающих к Вам, Костромския светильницы.

Слава, глас 6:

Края Костромскаго всечестнии отцы,/ во всю землю Российскую изыде вещания исправлений Ваших:/ тем на Небесех обрятосте мзду трудов Ваших,/ демонов разрушисте полки,/ Ангелов достигосте чины,/ ихже житию непорочно поревновали есте:/ дерзновение имуще ко Господу,/ мир испросите душам нашим.

И ныне, глас тойже:

Достойно есть яко воистину,/ блажити Тя Богородицу:/ в Твое бо Пречистое вшед чрево всех Содетель,/ плоть бысть, не преложився естеством,/ ниже мечтався о смотрении:/ но восприятей из Тебе словесно одушевленней плоти/ соединився, по ипостаси./ Отнюдуже благочестно, во обоих естествах являющихся, разнство творим./ Того моли Честная Пресвятая,/ низпослати нам мир и велию милость.

СТИХИРЫ НА СТИХОВНЕ; глас 1
Подобен «Небесных чинов…»:

Празднуется нами светло днесь/ Ваше святое торжество,/ иночества русского звезды умныя,/ светильницы духовнии земли Костромской;/ Сергия Великого отрасль достойная/ в молитвах присно ублажается.

Стих: Восхвалятся преподобнии во славе,/ и возрадуются на ложах своих.

Лозы плодоносящия виноградника Христова,/ сада ра́йского благоуханныя крины,/ насаждения Небесныя, псаломски, яко финикс, процветшии:/ добродетельми, яко кедри, иже в Ливане, умножившиеся;/ сеяния Господня плоды, в Костромской земли, духовно прозябшия/ нами в молитвах присно ублажаются.

Стих: Священницы Твои облекутся в правду,/ и преподобнии Твои возрадуются.

Постников священное сословие,/ псалмопения златогласные уста,/ подвига умнаго кадила благовонныя,/ храмы одушевленныя Господни;/ таин Небесных зрителие мысленные/ в молитвах нами присно ублажаются.

Слава, глас 2:

В преподобии и правде подвизавшиеся,/ Истину Христову паче всего земнаго возлюбили есте,/ и Божественнаго Царствия вожделевая,/ идеже несть болезнь, ни печаль, ни воздыхание,/ свято жительствовали в дебрех пустынных Костромских,/ безмолвно и безропотно скорби и искус терпя:/ Господом, яко адаманты веры прославлени бысте/ и, яко гради велиции, не могущие укрытися верху горы стоя,/ светом Божественным добродетелей Духа Святаго/ всякого, к Вам грядущего осиявали есте,/ проповедуя и благовествуя деяньми Воскресение Христово:/ нами ныне в молитвах восхваляетеся отцы равноангельстии.

И ныне, глас тойже:

Спаси от бед рабы Твоя Богородице,/ яко мы усердно к Тебе прибегаем, / яко Нерушимой Стене и Предстательству.

Тропари писаны на Велицей вечерни.

НА ВЕЛИЦЕЙ ВЕЧЕРНЕ:
«Блажен муж»: 1 антифон.
На «Господи воззвах»: стихиры, глас 8
подобен «О преславного чудесе» на 8:

О, преславного чудесе,/ Живоносный сад,/ на земли Костромской Божественный прозябший/ нами славословится днесь,/ сеяния небесного класы духовные,/ семена райские житницы Христовой,/ благодати водами напояемии,/ сторицею плод Владыце принесшии/ молитеся за ны, яко присно ублажаемии.

О, преславного чудесе,/ Костромской земли святых собор,/ песненно восхваляется днесь,/ и в молитвах призываются/ православия и благочестия истинного ревнители/ таинники Христовы Божественныя,/ вместилища благодатные Духа Святаго,/ храмины добродетелей честнии,/ и молитвенницы о душах наших.

О, преславного чудесе,/ звезды мысленнии, святии,/ благодатию небесною возжженныя,/ и в земли Костромской возсиявшии,/ Истины Христовой светильницы пресветлии,/ светом добродетелей ваших озаряете вся;/ в молитвах помощь подаваете/ и на путь спасения наставляете/ светоносную вашу память празднующих.

О, преславного чудесе,/ богоноснии источницы,/ реки из рая Эдемского текущия,/ и благодатно страну Костромскую орошающия,/ живоносною и спасительною влагой напояющия/ присно молебно почитающих вас,/ Костромские велии угодницы Божии,/ реки чудес показаша нам,/ притекающим к вам, преславнии.

О, преславного чудесе,/ житилие града небеснаго,/ жития течение добре скончавшии,/ нами воспеваются днесь,/ воздаяния трудов постнических восприимшии/ от Владыки Господа, егоже возлюбили есте,/ и яко ангельскому лику сопричтостеся/ молитвенницы за люди Костромской земли явистеся:/ сего ради вас величаем.

СТИХИРЫ преподобному Геннадию, глас и подобен тойже:

Возгревая дар Божий,/ живущий в Тебе отче всечестный Геннадие,/ отревая же всяку житейскую суету,/ очистив себе от всякия скверны плоти и духа,/ соделался еси сосуд в честь,/освящен и благопотребен Владыце,/ на всяко дело благое уготован./ Темже уготовася ти неувядаемый венец Божественныя славы,/ егоже сподоби, Господи, и нас грешных,/ молитв ради угодника Твоего.

Таланты приим от руки Господни,/ потщався добре,/ и другие приобрел еси ими,/ да благоугодная сотвориши Господеви./ Сего ради и услышал от Него сладчайший глас:/ добрый рабе, благий и верный,/ вниди в радость Господа твоего.

Якоже иногда мудрыя девы,/ приемше елей в сосудех со светильники своими,/ изыдоша в сретение жениху,/ изшел еси отче преподобный,/ в пустыню Любимоградскую,/ нося в чистом сердце своем,/ яко в сосуде, благоприятном Владыце,/ светильник веры, елей же любви Божественныя,/ и Спаса Господа взыскуя,/ Егоже и обрел еси,/ и в чертог Его вшел еси./ Темже вопием Ти:/ блажен еси, Геннадие,/ званный на вечерю брака Агнча.

Слава, глас 2:

Киими похвалами восхвалим преподобных отцев собор,/ киими славословии прославим светоносную память вашу,/ человецы бо небеснии и ангели земные явилися есте,/ в землях Костромских добродетельми просияв,/ ныне в небесных обителях живете веселящеся,/ светом Божественным воистину обожаеми,/ на земли же телеса ваша, яко кадила благовонныя,/ благоухают и источают исцеления всем,/ с верою и упованием в молитвах к вам прибегающим,/ и святое ваше творящим празднество.

И ныне, глас тойже:

Прейде сень законная,/ благодати пришедши:/ якоже бо купина не сгораше, опаляема,/ тако Дева родила еси/ и Дева пребыла еси./ Вместо столпа огненнаго/ праведное возсия Солнце,/ вместо Моисея — Христос,/ спасение душ наших.

Вход. Прокимен дне. И чтения 3 преподобнические.

Премудрости Соломони чтение (глава 3):

Праведных души в руце Божией, и не прикоснется их мука. / Непщевани быша во очесех безумных умрети, / и вменися озлобление исход их, / и еже от нас шествие — сокрушение, / они же суть в мире. / Ибо пред лицем человеческим аще и муку приимут, / упование их безсмертия исполнено: / и, вмале наказани бывше, / великими благодетельствовани будут, / яко Бог искуси их и обрете их достойны себе. / Яко злато в горниле, искуси их / и, яко всеплодие жертвенное, прият я. / И во время посещения их возсияют и, яко искры по стеблию, потекут. / Судят языком и обладают людьми, / и воцарится в них Господь во веки. / Надеющиися Нань уразумеют истину, / и вернии в любви пребудут Ему. / Яко благодать и милость в преподобных Его / и посещение во избранных Его.

Премудрости Соломони чтение (глава 4):

Праведник аще постигнет скончатися, в покои будет./ Старость бо честна не многолетна: ниже в числе лет исчитается./ Седина же есть мудрость человеком,/ и возраст старости, житие нескверное./ Благоугоден Богови быв, возлюблен бысть,/ и живый посреде грешник, преставлен бысть./ Восхищен бысть, да не злоба изменит разума его,/ или лесть прельстит душу его./ Рачение бо злобы помрачает добрая,/ и парение похоти пременяет ум незлобив./ Скончався вмале, исполни лета долга,/ угодна бо бе Господеви душа его./ Сего ради потщася от среды лукавствия./ Людие же видевше, и не разумевше,/ ниже положше в помышлении таковое,/ яко благодать и милость в преподобных Его/ и посещение во избранных Его./

Премудрости Соломони чтение (главы 5 и 6):

Праведницы во веки живут,/ и в Господе мзда их, и попечение их у Вышняго./ Сего ради приимут царствие благолепия/ и венец доброты от руки Господни,/ зане десницею покрыет я, и мышцею защитит их./ Приимет всеоружие рвение свое/ и вооружит тварь в месть врагом./ Облечется в броня правды/ и возложит шлем, суд нелицемерен./ Приимет щит непобедимый, преподобие,/ поострит же напрасный гнев во оружие,/ споборет же с ним мир на безумныя./ Пойдут праволучныя стрелы молниины/ и яко от благокругла лука облаков, на намерение полетят./ И от каменометныя ярости, исполнь падут грады./ Вознегодует на них вода морская,/ реки же потопят я нагло./ Сопротив станет им дух силы,/ и яко вихор развеет их,/ и опустошит всю землю беззаконие,/ и злодейство превратит престолы сильных./ Слышите убо, царие, и разумейте,/ навыкните, судии концев земли./ Внушите держащии множества, и гордяящиися о народех язык./ Яко дана есть от Господа держава вам/ и сила от Вышняго./

СТИХИРЫ НА ЛИТИИ:
Стихира храма и далее преподобному Геннадию, глас 2:

Избранниче Божий,/ от юности твоея исполнен сый духа разума и благочестия,/ духа страха Господня,/ презрел еси все суетная и тленная,/ в пустыни же водворяяся,/ яко Ангел во плоти, был еси,/ Геннадие блаженне./ Темже к тебе верою притекающе, молимся:/ моли Христа Бога спастися душам нашим.
Слава, глас 6:

Днесь благодать Святаго Духа нас собра,/ в празднование памяти богоносных отец земли Костромской,/ и вси сошедшиеся, тако рцем:/ радуйтеся, обители благодатные Духа Божественного/ святители Ионо и Никодиме,/ преподобные отцы Павле, Макарие, Геннадие,/ Кирилле, Пахомие, Александре, Иакове,/ Адриане, Паисие, Варнаво, Авраамие,/ Григорие, Ферапонте, Никито, Тимоне,/ также Тихоне и Иакове со инеми многими -/ вас бо Господь, яко всеплодие жертвенное прият,/ на земли прослави и на небеси венча:/ сего ради молитеся о спасении душ наших.
И ныне, глас тойже:

Богородице, Ты еси лоза истинная,/ возрастившая нам плод живота,/ Тебе молимся, молися Владычице/ со святыми отцами земли Костромской,/ помиловати души наша.

СТИХИРЫ НА СТИХОВНЕ, глас 5
Подобен «Радуйся…»:

Радуйтеся, богоносные отцы,/ горлицы Господни пустыннолюбивые,/ пением молитвенным дебри Костромской земли/ в славословиях благодатно огласившия;/ сосуди богоизбранные,/ Духа Святаго честныя жилища,/ слава церковная, добродетелей исправление./ Сего ради память вашу/ в песнех и пениях празднуем.

Стих: Восхвалятся преподобнии во славе,/ и возрадуются на ложах своих.

Радуйтеся, преподобнии отцы,/ постнического жития украшение,/ подвига молитвенного ревнителие,/ добродетелей божественных зерцала,/ богатство некрадомое благочестия,/ безмолвия духовного священнотаинники,/ края Костромского похвала и слава;/ темже сошедшеся благочестно вси/ светозарную вашу память празднующе.

Стих: Священницы Твои облекутся в правду,/ и преподобнии Твои возрадуются.

Радуйтеся, блаженнии отцы,/ в скудости на земли пожившие,/ глад и наготу претерпевшии,/ зной и жажду терпеливно понесшии:/ яко злато Владыце представшии,/ искушенное от земли, очищенное седмерицею,/ и в небесных обителях ныне веселящеся,/ поминайте в молитвах чтущих память вашу,/ в Костромской земле плоды священно прозябшии.

Слава, глас 6:

Приидите, вернии,/ духовно возвеселимся днесь,/яко в нарочитом дни праздника,/ и, ликовствующи, возопием:/ радуйся, Геннадие, веры благочестивое правило;/ радуйся, образе кротости духовныя./ Радуйся, светильниче Божественныя Троицы,/ Ейже предстоя со Ангелы,/ молися, угодниче Божий,/ да благодать и мир подаст душам нашим.

И ныне, глас тойже:

Творец и Избавитель мой, Пречистая, Христос Господь,/ из Твоих ложесн прошед, в мя оболкийся,/ первыя клятвы Адама свободи./ Темже Ти, Всечистая,/ яко Божии Матери же и Деве,/ воистину вопием немолчно:/ радуйся ангельски, радуйся, Владычице,/ предстательство, и покрове,/ и спасение душ наших.

НА БЛАГОСЛОВЕНИИ ХЛЕБОВ
Тропарь собора святых: глас 5

Яко многоцелебныя источницы,/ вод животворящих и духовных исполняемии,/ истаявших зноем страстей живительно напояете,/ землю Костромскую благодатно орошаете:/ преславный отцев святых собор,/ безплотных сожителие, Христовы воини;/ ихже молитвами Спасе,/ милости Твоя спасительныя нам даруй.

Тропарь преп. Геннадия, глас 4

Яко пустыннолюбивая горлица,/ от суетного и многомятежного мира в пустыню удалився,/ чистотою и говением, молитвами и труждением/ прославил еси Бога в душе и телеси своем./ И тако благочестно пожив,/ явился еси, преподобне Геннадие, пустыни Любимоградския украшение,/ и инокам честнаго жития образ/ и теплый молитвенник за всех,/ притекающих к тебе с верою.

И Богородице Дево… единожды.

НА УТРЕНИ:
На «Бог Господь»: тропарь святых, дважды.
Слава: тропарь преп. Геннадию; и ныне, глас 4:

Еже от века утаенное/ и Ангелом несведомое таинство,/ Тобою, Богородице, сущим на земли явися Бог,/ в неслитном соединении воплощаем/ и, Крест волею нас ради восприим,/ имже воскресив первозданного,/ спасе от смерти души наша.

По 1-м стихословии седален, глас 2:

Яко пришельцы на земли пребывая и горняя вожделевая,/ страсти плотския слезами покаянными изсушили есте,/ суеты жития временного, яко уметы вменив,/ звезды благодатные миру явилися есте./ Темже молим Богоносных отцев Костромских собор:/ молитися ко Господу, спастися верою хвалящим вас.

Слава, глас 3:

В законе Господнем поучаяся день и нощь/ и свидения Его испытуя,/ не дал еси отче, сна очима твоима,/ ни веждома твоима дремания,/ дондеже в сердце своем обрел еси место Господеви,/ селение богу Иаковлю./ Сего ради, яко храм духовен, благодатию Божиею приосененный,/ и доброе пристанище всем, притекающим к Тебе, явился еси,/ и неоскудный от честных мощей твоих/ источаеши верным источник исцелений.

И ныне, глас тойже:

Пречистая и Преблагословенная Дево,/ Божественным рождеством Твоим истлевшее страстьми земнородных естество обновися/ и, свобождая от смерти и адовых уз, приведеся к наследию жизни вечныя./ Темже Тя вси роди достойно ублажают.

По 2-м стихословии седален, глас 6:

Равноангельное житие показасте нам, преподобныя отцы,/ пламень бо огня Божественного в сердце своем стяжавши;/ в постнических и бденных подвизех преуспевая,/ к почести вышняго града, небесного Иерусалима, устремилися есте,/ и достигши того, яко предстателие и молитвенницы за люди земли Костромския/ нами ныне ублажаетеся.

Слава, глас тойже:

Облеченный в виссон чистоты и правды,/ благоухая мирами добродетелей/ и ни во едином от благодатных дарований лишаяся, всечестный Геннадие,/ вемы, яко с лики праведных и с сонмы бесплотных сил предстоиши пред престолом Божиим,/ славя выну Царя Славы, Господа Вседержителя, и моляся прилежно,/ да и мы, многогрешнии и неключимии раби,/ оправдишася благодатию Его,/ наследницы будем жизни вечныя.

И ныне, глас тойже:

Непостижимому и неизреченному,/ купно же славному и ужасному таинству вочеловечения Бога Слова дивящеся,/ в преклонении душ и сердец наших пред Тобою,/ Дево Пречистая, ликовствуя, взываем:/ радуйся, Благодатная, Господь с Тобою.

ВЕЛИЧАНИЕ:

Ублажаем вас/ преподобных отцев собор, края Костромского покровителей,/ и чтим святую память вашу,/ вы бо молите за нас/ Христа Бога нашего.

Псалом избранный:

1. Терпя, потерпех Господа, и внят ми, и услыша молитву мою/
2. Постави на камени нозе мои и исправи стопы моя./
3. Се удалихся, бегая, и водворихся в пустыни./
4. Вси языцы обыдоша мя, и Именем Господним противляхся им./
5. Честна пред Господом смерть преподобных Его.
6. Пойте Господеви, преподобнии Его, и исповедайте память святыни Его, во всех людех чудеса Его./
Слава и ныне;/ Аллилуйя: трижды.

ПО ПОЛИЕЛЕЕ седален, глас 7:

Блажени есте, преподобные отцы,/ яко земных и тленных наслаждений небрегосте/ и в земле Костромской мужественно постнически подвизавшиеся,/ для мира сего умершии прежде смерти воздержанием велиим явилися есте./ Сего ради по преставлении своем у престола Вседержителева предстояще,/ молитеся о спасении душ наших.

Слава, глас 1:

Скорбь и тесноту, поношения и озлобления/ Царствия ради Небеснаго и за Имя искупльшаго нас/ и предавшаго Себе за ны, Господа нашего Иисуса Христа,/ претерпел еси, отче преподобне, и не изнемогл еси./ Сего ради блажен еси, соблюдший заповеди и Богови верный даже до смерти,/ неувядаемый бо славы венец уготовася ти./ Егоже, Царю и Господи, не лиши и нас, грешных,/ молитв ради угодника Твоего Геннадия.

И ныне, глас тойже:

Яко к нерушимой стене и тихому пристанищу,/ к покрову Твоему, Преблагословенная Богородице, притекающе,/ влаемии волнами житейских попечений, вопием:/ Владычице, покрый, соблюди и спаси на Тя уповающия.

Степенна 1 антифон 4-го гласа.

Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми?

Всякое дыхание…: Евангелие от Матфея, зач. 43
По 50-м псалме стихира, глас 6:

Днесь благодать Святаго Духа нас собра,/ в празднование памяти богоносных отец земли Костромской,/ и вси сошедшиеся, тако рцем:/ радуйтеся, обители благодатные Духа Божественного/ святители Ионо и Никодиме,/ преподобные отцы Павле, Макарие, Геннадие,/ Кирилле, Пахомие, Александре, Иакове,/ Адриане, Паисие, Варнаво, Авраамие,/ Григорие, Ферапонте, Никито, Тимоне,/ также Тихоне и Иакове со инеми многими -/ вас бо Господь, яко всеплодие жертвенное прият,/ на земли прослави и на небеси венча:/ сего ради молитеся о спасении душ наших.

КАНОН
СОБОРУ СВЯТЫХ ОТЕЦ, В ЗЕМЛИ КОСТРОМСКОЙ ПРОСИЯВШИХ

Краегранесие:
СЛАВУ И ПОХВАЛУ КРАЯ КОСТРОМСКОГО ПОЮ:
ПЕСНЬ 1. Глас 8

Ирмос: Богоизбранному Израилю* сквозе Чермнаго моря Моисей*, гласом Господним наставляемый*, путь пешеходящий показа*; свободив от погони вражия* Богу победную песнь поя: яко прославися.

Запев: Вси святии края Костромского молите Бога о нас.

Светом благодати озаряеми, святии,/ просвещением Истины землю Костромскую удобрили есте,/ сего ради людие/вельми вас почитают и восхваляют, глаголя:/ во святых своих дивен Господь, славно прославися.

Запев.
Любомудрие небесное/паче славы мира сего возлюбивше,/ и желания плотские отвергше, святии,/ все духовные стремления своя/ во смирение Господеви повинули есте,/ присно поя Ему: славно прославися.

Слава:
Ангели земныя и человецы небеснии,/ отцы Костромские, явилися есте,/ сиянием Трисолнечного Божества озаряя,/ просвещая и ко спасению наставляя души,/ благодарно вопиющих о подвизех ваших Господу:/ славно прославися.

И ныне:
Вышних сил Превысшая/ и плотию Бесплотного рождшая, Пречистая Владычице,/ Сына Твоего и Христа Бога нашего,/ со всеми святыми края Костромского/ моли о спасении душ наших.

ПЕСНЬ 3

Ирмос: Смиряяй и возвышаяй, елико восхоте Господь* и благодатною препоясуяй силою*, на недвижимом камени веры утверждаяй*, и души от страстей избавляяй*; несть свят, паче Тебе, Господи.

Запев.
Умом чистейшим разсмотрел еси/ Ума всех виновнаго,/ сего ради прием дарование чудес,/ верные удивляеши, любовиюТебе почитающия,/ премудре святителю Ионо.
Запев.
Истиное смирение и целомудрие стяжав попремногу/ и чистоту телесную, якоже подобает святым,/ лета многа в пустыни пребывшу/ в безмолвии, пощении и всех скорбных в терпении;/ тя, Павле, яко избранника Христова, ублажаем.

Слава:
Присно Господеви молитвою прилепляяся/ и постом страстей пламень угашая,/ росу Божественныя благодати в душу свою приим,/ отче богоносе Макарие,/ на реце Письме водворясь,/ в подвизех доблих потщался еси:/ сего ради отверзеся тебе Царствие Небесное.

И ныне:
Огнь Божественный благодатный,/ Владычице, сниде на Тя/ и Сила Вышняго осени Тя;/ и яко Мати и ходатаице рода Христианского/ молишися о нас: тем Тя величаем.

Седален, глас 4:

Волнения моря житейского невлаяся преплывше,/ ко пристанищу спасительному/ со славою приидосте, Богомудрии отцы,/ и сего ради предстатели и молитвенницы/ за люди земли Костромской явилися есте.

Слава и ныне, глас тойже:

Блажим Тя вси,/ Пресвятая Владычице Богородице, и молим Тя:/ со святыми преподобными отцами Костромскими,/ испроси душам нашим/ у Христа велией милости.

ПЕСНЬ 4

Ирмос: Господь мой – сила моя*, и на высокая возводит мя* — пророк Аввакум моляся, вопияше*, о Господе возрадовашася*, Бог от юга приидет* во спасение людей своих.

Запев.
Христу подобяся кротостию,/ вознеслся безстрастием на высоту добродетелей духовных,/ и бесовскую гордыню отженив,/ яко солнце от востока, чудес лучами/ возсиял еси, отче Геннадие,/ велией славы от Господа сподобяся.

Запев.
Всенощные стояния и подвиг постнический,/ паче красная мира сего возлюбив;/ кадило благовонное и миро благоуханное Владыце явился еси;/ на Белоезере жительствуя, слезами и потами благодать молитвы стяжав,/ души притекающих к тебе ко спасению наставлял еси,/ отче Кирилле блаженне.

Слава:
Адамантом в крепости духа быв, святе Пахомие,/ державу вражию и силу низложил еси,/ и похвалу победную почести приял еси,/ чудесными сиянии озаряя вся.

И ныне:
Лукавый умертвися змий, Дево, по рождестве Твоем,/ и льстивый враг упразднися, Пречистая;/ мы же Тя ублажаем,/ яко с Тобою Господь.

ПЕСНЬ 5

Ирмос: Свет повеления Твоя*, в них же настави мя, Владыко*, сего ради к Тебе утреннюю* — Мира бо Божественного подательТы еси.

Запев.
Умертвив, преподобне Александре,/ плотския страсти воздержанием,/ Христу прилепился еси;/ и тело свое велиими подвиги изнуривши,/ кладезь Божественных дарований по благодати явился еси,/ и яко победитель в духовных бранех/ от Господа увенчася.

Запев.
Крепостию духа в сердце своем Христа стяжав,/ и яко финикс, отче Иакове, во стране Галичестей процвел еси;/ высотою смирения украшаем,/ сокрушил еси гордыни змиев главы;/ темже Господь с лики преподобных сочета Тя.

Слава:
Радуяся о Господе, храм боголепен воздвигл еси,/ и той во имя рождества Предтечи именовал еси,/ в немже славится присно/ честное имя твое, Иакове преподобне.

И ныне:
Ангельский собор и человеческий род/ славит Тя и блажит,/ яко Матерь Христа, Спаса нашего,/ и молитвенницу о душах наших.

ПЕСНЬ 6

Ирмос: Возопих из чрева китова Иона*: да приидет к Тебе, Господи, молитва моя*, яко глубина морская пожре мя*, и в преисподних обретошася душа моя*; тем с пророком взываю Тебе Боже*: возведи от тли живот мой.

Запев.
Яко кедр, иже в Ливане,/ умножи Господь добродетели твоя:/ руку бо возложив на рало/ не озирался еси вспять, святе Адриане;/ сего ради глас услыша, глаголющий:/ благий рабе и верный,/ вниди в радость Господа твоего.

Запев.
Кто не удивится твоему, преподобне Паисие, смирению;/ или кто не похвалит святое твое на земли пребывание:/ ужасается ми ум,/ како с плотию безплотным ангельским силам уподобился еси;/ с нимиже ныне предстоя Пресвятей Троице,/ моли о нас непрестанно.

Слава:
Обителию явився Духа Святаго/ и на Ветлуге уединенно жительствуя,/ мнози души от греха ко пристанищу благому/ и спасительному, Христу, направлял еси,/ окормляя, обличая и уча словом и примером подвигов своих:/ сего ради венец от Господа вечный приим,/ отче блаженне Варнаво.

И ныне:
Славлю Тя, и любовию величаю,/ Препетая Владычице:/ обетшавшия ны грехом, обновила еси;/ и о Тебе вси радуемся,/ яко Бога Слова родила еси.
Кондак, глас 8:

Костромского края благочестия подвижники/ и за грады и веси страны Российския теплыя предстатели явистеся,/ отцы преблаженнии, Христа Бога молите о нас,/ священный ваш собор почитающих и с любовию вопиющих:/ радуйтеся, отцы предивнии,/ Костромского края и всея России похвало и утверждение.

Икос, подобен акафиста «Радуйся…»:

Яко Богонасажденный сад, прозябший Божественною благодатию,/ явилися есте, отцы всечестнии;/ в землях Костромских плод мног сторицею принесшии;/ край сей молитвами и подвигами освятившия,/ и души мнози ко Христу приведшии;/ сего ради ублажаем вас, присно поя:/ радуйтеся, крины сельные, от рая Господня процветшии;/ радуйтеся, звезды мысленныя, яко солнце от востока духовного возсиявшии./ Радуйтеся, реки благодатныя, от Источника Божественного проистекающие;/ радуйтеся, светила умные, землю Костромскую светом благодати озаряющия./ Радуйтеся, наставницы, в вере истиной просвещающия;/ радуйтеся, пастырие, стадо словесных овец Христовых умножающия./ Радуйтеся, отцы предивнии, Костромского края и всея России похвало и утверждение.

ПЕСНЬ 7

Ирмос: Богомерзкую идольскую лесть* в Вавилоне отвергоша отроцы*, истиннаго Бога исповедавше*, в пещь раззженную сами поидоша*, и небесною влагою орошаеми*, песнь победную вопияху*: Благословен еси, Боже отец наших.

Запев.
Тленныя и земныя наслаждения отринув,/ пустынное житие возлюбил еси;/ и обители четыре создав,/ обучение ко благочестию лику иноческому явился еси;/ и в молитве на горе пребывая,/ образ Матери Господни обрел еси предивно,/ Богоносе Авраамие, отче наш.

Запев.
Радуется дух твой ныне в небесных обителях, Макарие,/ яко от юности Бога возлюбил еси,/ и Тому от всея души поработав,/ Галичестей стране и всея Российстей земли похвало и утверждение явился еси;/ безплотных житию в пустыни подражая,/ яко Ангел непорочно пожил еси;/ сего ради зовем Ти:/ радуйся, жилище честное Духа Святаго.

Слава:
Отче Григорие, иже на Пельшме подвизавыйся;/ мира сего любве отреклся еси,/ и достиже Горняго Иерусалима,/ идеже Христос царствует со Отцем и Духом,/ венца нетленного сподобился еси;/ со безплотными лики поя:/ благословен еси, Боже, отец наших.

И ныне:
Мати Света, Христа Бога нашего,/ Едина Неискусомужна явилася еси, Всенепорочная,/ и девствующи, законы обновляеши естества.

ПЕСНЬ 8

Ирмос: Землю на водах Повесившаго*, и огнь во влагу Преложившаго*, отроцы в пещи благословяще* песнь с благодарением пояху*: вся дела благословите, пойте Господа.

Запев.
Свято житие твое, преподобне Ферапонте,/ купно же и смирение, еже стяжал еси;/ и ныне святое тело твое/ исцеления многа источает с верою притекающим;/ темже молим тя: душевное здравие подавай нам,/ присно Господу вопиющим:/ пойте и превозносите Его во вся веки.

Запев.
Кострома вельми тобою хва́лится,/ и ублажает тя, Никито досточудне,/ яко вселившеюся благодатию в душу твою/ лукавно живущии в человецех нечистии дуси отгоними бывают;/ и Ангели на небесех о твоем на земли непорочном житии радующеся,/ хвалу возсылают Господу, вопия:/ пойте и превозносите Его во вся веки.

(Благословим Отца и Сына…)

Слава:
Очистив ум свой, преподобне,/ в пустыни, яко в царских чертозех, со многим веселием живый;/ душетленные страсти воздержанием умертвил еси,/ и слезными потоки лукавого змия, яко в мори, погрузил еси,/ и, яко прах, того без вести сотворил еси,/ Луховская похвало, отче наш Тихоне, о Господе вопия:/ пойте и превозносите Его во вся веки.

И ныне:
Господа и Спаса на́шего/ плотию родила еси, Безневестная Владычице,/ и Тобою избавление в мир прииде,/ и Адам от клятвы избавлен бысть, взывая благодаряще:/ Господа пойте и превозносите во вся веки.

Поем «Честнейшую…»

ПЕСНЬ 9

Ирмос: Живоносный Источниче*, праведных честная Похвало*, Херувимов Честнейшая*, Серафимов без сравнения Славнейшая*, темже Тя, Благодатная, величаем.

Запев.
Отлучився мирскаго пристрастия,/ в постнических удолиях, яко крин процвел еси, отче наш Тимоне;/ преподобным Серафимом в Надееву пустынь благословленный,/ и в благодатном видении от святителя Николая укрепленный,/ храмы воздвизал еси;/ и иноков к пути теснейшему и блаженному призывая,/ в истиной вере наставлял еси;/ и всех приходящих к тебе утешал еси, старче блаженне.

Запев.
Подвигом добрым подвизавшиеся,/ священномучениче Никодиме,/ со инеми новомученицами и исповедницами края Костромского;/ таже и Царственнии страстотерпцы, яко корене Костромского отрасль,/ идеже и на царство венчашася род изначала;/ молитвы, яко дерзновенных исповедников Господа пред отступники и гонители:/ очистите нас от грехов наших молитвами вашими,/ да утвердимся в вере Православной.
Слава:
Отцы предивнии и всечестные,/ земли Костромской молитвенницы и покровителие,/ течение жития привременнаго скончавшие,/ и веру и заповеди Господни свято соблюдшии;/ ныне радуяся и веселяся,/ в Небесных обителех почести обетованные приимшии;/ не отриньте молитв наших,/ яко да ублажающе, любовию прославляем вас.
И ныне:
Юнице Нескверная,/ Юнца Божественного рождшая,/ приими молитву рабов Твоих;/ да восхваляем Тя, яко Хранительницу земли нашея,/ и Заступницу всего рода христианского.

Светилен, глас 2:

Паче света солнечного, благодатным Светом/ просветилися есте, святии отцы,/ и сиянием Божественным землю Костромскую озарили есте,/ деяньми проповедуя Христово Воскресение;/ сего ради вас ублажаем.

Слава и ныне, глас тойже:

Образ Твой, Пресвятая Владычице, Феодоровским нарицаемый,/ якоже ковчег завета в земли Костромской,/ почитаем, храним и прославляем:/ исцеления бо и утешения чрез него подаеши всем,/ с верою и упованием к Тебе притекающим.

Стихиры на «Хвалитех», глас 8:

Ангелов собеседницы,/ и монашествующих кротции наставницы,/ православия учители и ревнители,/ края Костромского просветители;/ якоже солнце от востока, лучами озаряющии,/ светом Божественным чудес ваших/ и яко земная отложив, Небесная восприясте/ обители Духа явистеся Пресвятаго,/ сего ради ныне в чертозех Господних ублажаетеся,/ и Престолу Владычнему предстоя,/ о нас непрестанно молитеся/ почитающих верою всечестную память вашу.

Радуетеся ныне, благословеннии отцы,/ жития земнаго треволнения прошедши,/ и пристанища благоутишного достигше,/ небесными дарованьми украсившиеся:/ звезды мысленныя, светлейше просиявшие в землях Костромских,/ озаряющия верных сердца светом благодати,/ от Источника — Солнца незаходимаго, Христа Бога нашего,/ и молитеся о душах наших.

Ины стихиры, преподобному Геннадию; глас тойже:

В законе Господнем поучаяся день и нощь/ и свидения Его испытуя,/ не дал еси отче, сна очима твоима,/ ни веждома твоима дремания,/ дондеже в сердце своем обрел еси место Господеви,/ селение Богу Иаковлю./ Сего ради, яко храм духовен, благодатию Божиею приосененный,/ и доброе пристанище всем, притекающим к Тебе, явился еси,/ и неоскудный от честных мощей твоих/ источаеши верным источник исцелений.

Боголепно просия священная память твоя, преподобне,/ лучами бо добродетелей,/ светом же чудес твоих озаряеши сердца верных,/ сию убо празднующе с радостию, ублажаем тя,/ принося песнь и благодарение Господу.

Слава, глас тойже:

Чтуще вас, преподобнии Костромские отцы,/ прославляем дивно предизбравшего вас Господа,/ Егоже ради пожеланий плотских отрекостеся,/ и духовнии людям явишася наставницы,/ ныне в небесных обителях живете веселящеся,/ телеса же ваша, яже на земли,/ источают исцеления и отгоняют духи лукавыя:/ сего ради Божественную и светоносную/ ныне совершаем вашу память,/ в молитвах помощи вашея призывающе.

И ныне, глас тойже:

Владычице, приими молитву раб Твоих,/ и избави нас/ от всякия нужды и печали.

СЛАВОСЛОВИЕ ВЕЛИКОЕ; Тропарь собору и проч.
И отпуст; Многолетны

НА ЛИТУРГИИ:
Прокимен, глас 7:
Восхвалятся преподобнии во славе,/ и возрадуются на ложах своих.

Стих: Священницы Твои облекутся в правду, и преподобнии Твои возрадуются.

Апостол: К Галатам, зачало 213
Аллилуия: глас 4

Воззваша праведнии, и Господь услыша их, и от всех скорбей их избави их.

Стих: Многи скорби праведным, и от всех их избавит я Господь.

Евангелие: От Луки, зачало 24

Причастен: Радуйтеся праведнии о Господе,/ правым подобает похвала. Аллилуия: 3 раза.

 

МОЛИТВА
собору преподобных отец в земле Костромской просиявших:

Запев на молитву: Преподобнии отцы, края Костромского покровителие, молите Бога о нас.

О, преславнии отцы земли Костромской в подвизех благочестия благодатно просиявшие! Ублажающе ваше Боголюбивое пустынническое житие, со смирением и воздержанием срастворенное; почитающи всенощные ваши бдения и слезы умиленныя, от молитвенных воздыханий сердечных проистекающия; восхваляющи посты и лишения велиции; Христа и Славы Царствия Его ради вами подъятые; воспевающи брани ваши мысленныя противу врага спасения душ наших ведомыя и победно от Господа увенчанные; прославляюще чудеса, в земном вашем житии сущии, и по преставлении душ ваших к миру горнему от святых мощей благодатно проистекающии: молим вас, святии угодници Божии, будите пред Престолом Божиим, присно заступницы и ходатаи, и молитвении предстателие нам, ныне всечестную вашу память празднующим, яко Господом сынами Света нареченнии, и со Ангельскими ликами вчиненнии в Царствии Небеснем, идеже живете веселящеся и наслаждаетеся лицезрения Света Невечерняго Христа, Спасителя нашего, Емуже подобает всякая слава, честь и поклонение, со Безначальным Его Отцем и Пресвятым, и Благим, и Животворящим Духом ныне, и присно, и во веки веков.
Аминь.

 

СОБОР СВЯТЫХ ОТЦЕВ
В ЗЕМЛЕ КОСТРОМСКОЙ ПРОСИЯВШИХ

По благословению Святейшего Патриарха Московского и всея Руси Пимена в 1981 году установлен соборный праздник святых древней Костромской земли. 23 января/5 февраля 1982 года, в день памяти преподобного Геннадия, Костромского и Любимоградского чудотворца, было впервые совершено празднование Собора святых, в земле Костромской просиявших.
По свидетельству русских летописей, город Кострома был основан в 1152 г. После смерти великого князя владимирского Всеволода, по прозвищу Большое Гнездо (1154—1212), во Владимирском княжестве образовались три удела: Суздальский, Московский и Костромской.
В XIV—XV вв. ученики преподобного Сергия Радонежского, по его благословению, основали несколько монастырей на Костромской земле. Здесь, на обширной равнине, изрезанной реками, пролегли их пути: один — по реке Шексне на Белоозере, другой — по реке Костроме на Вычегду. В освоении костромского междуречья трудились преподобные Аврамий Чухломской (+ 1375; память 20 июля/2 августа) — основатель нескольких обителей, просветитель местных чудских племен; Иаков Железноборовский (+ 1442; память 11/24 апреля), Макарий Писемский (XIV в.; память 10/23 января), Павел Обнорский (+ 1429; память 10/23 января).

По благословению преподобных Кирилла Белозерского (+ 1427; память 9/22 июня), также ученика аввы Сергия, и преемника Кирилла — Корнилия Комельского, на Костромской земле подвизались впоследствии, преподобные Геннадий Костромской и Любимоградский (+ 1565; память 23 января/5 февраля), Кирилл Новоезерский (+ 1532; память 4/17 февраля), Адриан Монзенский (+ 1610; память 5/18 мая) — основатель Благовещенского монастыря на реке Монзе, Ферапонт Монзенский (+ 1597; память 12/25 декабря). Введенскую пустынь основал преподобный Иаков Брылинский (иначе Брылеевский) (XV в., память 11/24 апреля) — ученик и сподвижник преподобного Иакова Железноборовского. В монастыре преподобного Паисия Галичского (+ 1460; память 23 мая/5 июня), который обрел Овиновский образ Божией Матери (празднование 15/28 августа), подвизался Иаков Галичский (в конце XV—начале XVI вв., память 7/20 апреля). В XVI веке преподобный Александр Вочский (память 27 марта/9 апреля) основал Преображенский монастырь на реке Воче.

Святитель Дионисий Суздальский (+ 1385; память 26 июня/9 июля), спостник и собеседник преподобного Сергия Радонежского, в середине XV века «послал двенадцать человек из своей братии в верхние грады и страны, идеже кого Бог благословит, для духовного просвещения народа и основания обителей», в числе двенадцати был и преподобный Макарий Унженский (+ 1444; память 25 июля/7 августа) — основатель трех обителей. Макариево-Успенский монастырь в XVII веке, в правление Михаила Феодоровича и Алексея Михайловича, стал вторым по значению после Троице-Сергиевой лавры. Сюда был назначен игуменом будущий святитель Митрофан, епископ Воронежский (+ 1703; память 23 ноября/6 декабря), впоследствии принявший в схиме имя в честь преподобного Макария Унженского. Узы духовного братства связывают преподобного Макария с преподобным Варнавой Ветлужским (+ 1445; память 11/24 июня) — основателем Варнавиной обители, вокруг которой спустя некоторое время вырос город Варнавин. Преподобный Григорий Пельшемский (+ 1442; память 30 сентября/13 октября) явился основателем обители на реке Пельшме. Он положил немало трудов, чтобы примирить враждовавших между собою русских удельных князей.
Святитель Иона, митрополит Московский и всея Руси (+ 1461; память 15/28 июня), был родом из Костромской земли. Он начал свои иноческие подвиги в одном из галичских монастырей. По благословению святителя Алексия, митрополита Московского, преподобный Пахомий Нерехтский (+ 1384, память 15/28 мая) основал в Костромском крае обитель во имя Святой Троицы.

Ученики преподобного Сергия Радонежского, который «был учитель всем монастырям, иже на Руси», просвещая Христовой верой языческие и полуязыческие племена, присоединяли их к Русской Православной Церкви. Из многочисленных ветвей духовного генеалогического древа, имеющего корни в Троице-Сергиевой лавре, ветви — Белозерская (от преподобного Кирилла Белозерского), Комельская (от преподобного Корнилия Комельского), Железноборовская (от преподобного Иакова Железноборовского), Нижегородская (от святителя Суздальского Дионисия) принесли обильные плоды добротолюбия и молитвы на Костромской земле.

Литература:

  1. Святые угодники Божии и подвижники Костромские, их жизнь, подвиги, кончина и чудеса. Кострома, 1879;
  2. Троицкий Патерик, или сказания о святых угодниках Божиих, под благодатным водительством Преподобного Сергия в его Троицкой и других обителях, подвигом просиявших. Издание Свято-троицкой Сергиевой Лавры, 1896.

 

Добавить комментарий

Ваш e-mail не будет опубликован.